Skapaðar og áunnar ímyndir af Íslandi!!

Ég ætla að leyfa ykkur að njóta þess að lesa afrakstur fyrirlestrar sem ég hélt um daginn um Skapaðar og áunnar ímyndir af Íslandi

Ég ætla að kynna fyrir ykkur muninn á Sköpuðum og áunnum ímyndum. Því oft á tíðum eru ímyndir af ferðamannastöðum skapaðar til þess að draga fleiri ferðamenn að. Þegar talað er um skapaða ímynd er verið að meina sú mynd sem ferðamannafyrirtæki, ferðamálaráð og önnur stór fyrirtæki eru að auglýsa út á við.

Áunnar ímyndir eru aftur á móti þær ímyndir sem við höfum í hausnum af ákveðnum stað, hlut eða landi án þess að hafa orðið fyrir einhverjum áróðri af utan að komandi aðila.

Að þessu gefnu tökum þá dæmi um landið Ísland. Ísland hefur orðið fyrir ákveðnum áróðri innlendra ferðaheildsala.
Markaðsfræðingar hugsa í því samhengi, hvað er það sem selur? Hverjir eru það sem eiga peninganna? og Hver er markhópur? Jú þeir hafa reiknað út hverjir það eru sem eiga mestu peninganna og þannig fundið út hvaða markhópur passi Íslandi best. Já það eru eins og þið vitið eflaust flest, karlmenn á aldrinum 30-60 ára, og hvernig eru þeir narraðir hingað?


Jú með myndum af íslenskum hávöxnum, ljóshærðum, fallegum stúlkum, en eins og kemur fram í þætti Oprah Winfrey í Janúar, þá lítum við víst allar þannig út!! Þessar stúlkur eru oft nefndar Beauty Queens í auglýsingunum, eins og ein þeirra hljómaði Pester a Beuty queen sem lauslega þýðist að þjarka eða erta fegurðardrottningu.

Talað var einnig um Íslenskt kvenfólk í þættinum hjá Oprah sem auðlind þjóðarinnar, eins og olían er fyrir Írak eða Saudí Arabíu.....
Hingað til hefur fiskurinn og heita vatnið verið talin auðlind Íslands, en það er greinilega löngu liðið undir lok að auglýsa það sem auðlind okkar og kvenfólkið búið að taka við á þeim vígvelli.

En er nokkuð svo slæmt að vera auðlind? Jú leifið mér að greina nánar frá því hvað auðlind þýðir. Orðið er eins og gefur að skilja dregið af orðinu auður eða sjóður. Auðlind er t.d. eitthvað sem enginn annar á og hægt er að selja á erlendum markaði til þess að fá erlent fjármagn inn til landsins og auka þar með hagsæld þjóðar. Yfirleitt er þetta útflutningsafurð, en í þessu samhengi er ætlast til að fluttir séu inn erlendir karlmenn til þess eins að stara á okkur Íslensku, hávöxnu, bláeygðu, ljóshærðu, flottu og fallegu kvenmennina. Ég veit ekki um ykkur, en ég hef ekki áhuga á að vera auðlind, hvað þá flokkuð sem útflutningsvara!! Enda er ég rétt um 1.60, Rauðhærð með græn augu, ætli ég yrði flokkuð sem B-vara í þessum útfluttningsprósess!!


Quinten Tarentino sagði í viðtali hjá Conen O´Brien í janúar að hann hefði verið í partýi á Íslandi á gamlárskvöld umkringdur fegurðardísum. Hann sagði að hvert sem hann hafi liti hefðu verið Súper módel. Og já að vissu leiti hafði hann rétt fyrri sér. Þar sem að í þetta tiltekna partý var aðeins ákveðnu útvöldu fólki boðið, þ.e.a.s. Módelum, fyrrverandi keppendum í ýmsum ungfrú hitt og þetta keppnum, Ford fyrirsætum og fólki í góðu líkamlegu formi eins og dönsurum. Ég mætti á svæðið sem fulltrúi dansara, og mér stórlega misbauð sú sjón sem blasti við mér. Þetta var samansafn af já... eins og Tarentínó segir, Fegurðardrottningum, það var ekki ein manneskja þarna inni sem var klædd í eitthvað sem talist gæti til almennilegs klæðnaðar. Ég get sagt ykkur það að ég labbaði einn hring um svæðið og út aftur. Þetta var ekki samkoma að mínu skapi.
En mér er spurn, er ekki með þessu verið að skapa ímynd af Íslandi? Er ekki verið að sviðssetja raunveruleikann?
Þarna kemur hann, ásamt fleiri frægum einstaklingum, inn á skemmtistað þar sem allt er morandi í fallegu kvenfólki. Og það sem meira er Hvernig á hann að vita það að það er líka til venjulegt kvenfólk á Íslandi, ef þetta er eina ímyndin sem hann fær að sjá?

Við ættum samt ekki beint að vera velta okkur upp úr því hvað honum finnst, heldur þeirri staðreynd að það er búið að troða því inn í hausinn á okkur að sú ímynd sem er af Íslandi erlendis er að hér sé fullt af fallegu kvenfólki sem er mjög sjálfstætt og lifir villtu kynlífi, eins og kemur fram í þætti Oprah Winfrey. Því vilja skipuleggjendur ýmissa samkoma ekki bregðast sínum gestum og reyna með því móti að skapa þá ímynd sem ætlast er til. Finnst engum neitt athugavert við það? Hvernig væri að leyfa bara okkar gestum að upplifa landið á sinn eigin hátt. Án allra skapaðra ímynda af landi og þjóð. Er ekki í þessu eins og mörgu öðru sannleikurinn alltaf sagna bestur?

Takk fyrir

Bið að heilsa og endilega kommenntiði á þetta hjá mér, er nebblega að skrifa um þetta í b.s. ritgerðinni minni og ný sjónarhorn eru vel þegin!!

bið að heilsa Dillibossi Knúdsen biður að heilsa Dillirössu!!

þetta blogg var í boði páskaeggsins sem ég fæ ekki um páskana!